Vendet e mbi 500 zyrtarëve policor serbë, pas dorëheqjeve të tyre, siç duket nuk do mund të zëvendësohen.
Ani pse disa prej këtyre vendeve u vendosen disa zyrtarë të rinj, tashmë edhe ata kanë filluar të dorëhiqen.
Deri të premten është raportuar për 7 policë serbë që kanë vendosur të mos jenë më pjesë e Policisë së Republikës së Kosovës, krejt kjo si shkak i linçimit e kërcimeve nga Beogradi zyrtar.
Për këto kërcënime institucionet e Kosovës ju kanë bërë thirrje ndërkombëtarëve që të reagojnë ndaj Serbisë në mënyrë që ta ndalin shantazhin. Pas thirrjeve të institucioneve te Kosovës, Dukagjini ka drejtuar pyetje në adresë të BE-së por të njëjtit nuk kanë kthyer përgjigje.
Por një angazhim maksimal politik diplomatik për këtë po e sheh ish zëvendësministri i Punëve të Brendshme, Valdet Hoxha.
“Tashmë nuk është thjesht çështje teknike procedurale por duhet një angazhim maksimal politiko diplomatik për ta zgjidhur këtë temë”, ka thënë Hoxha.
Hoxha po ashtu thotë se do të jetë e pamundur që të plotësohet vakumi institucional, i krijuar në veri, tek shton se qeveria duhet të hartojë një plan për këtë çështje.
“Qeveria e Kosovës në pajtim me partnerët tanë duhet që të hartojë një plan të saktë, me kalendar me afate të sakta kohore për të filluar me zgjedhjet në ato komuna, e pastaj të krijohen kushtet për kthimin e policëve serb, por edhe segmenteve të tjera të drejtësisë”, ka shtuar Hoxha.
Gjatë ditës së djeshme, për dorëheqjen e policëve serbë, ka reaguar edhe presidentja e Kosovës, Vjosa Osmani e ministri i Punëve të Brendshme, Xhelal Sveçla, të cilët kanë thënë se Serbia është fajtore, dhe se BE-ja dhe SHBA, duhet të ndërmarrin masa ndaj saj.
Pas vendimeve të qeverisë, në nëntor të vitit të kaluar, të gjithë zyrtarët policor serb dhanë dorëheqje nga pozitat e tyre. Të pakta në numër, ka mbetur edhe stafi Gjykatës e Prokurorisë në komunat veriore të vendit.