Një tentim vrasje ka ndodhur mbrëmjen e së enjtes së 11 janarit në rrugën “Bajram Bahtiri” në Prishtinë.
Siç ka njoftuar policia, në këtë rast janë përfshirë katër persona të dyshuar, nga të cilët ka pasur të shtëna me armë zjarri. Si rezultat i kësaj, njëri prej të dyshuarve është plagosur dhe është trajtuar në QKUK.
Policia ka ndërmarrë masa të menjëhershme, duke arrestuar dy nga të dyshuarit, të cilët më pas janë liruar.
Ndërsa, dy prej dyshuarve të tjerë gjenden ende në arrati.
Vendimi për lirimin e dy të arrestuarve është marrë në procedurën e rregullt nga prokurori.
“Raportohet se ka pasur të shtëna me armë zjarri në mes katër të dyshuarve meshkuj kosovarë. Si pasojë, një i dyshuari është plagosur dhe është trajtuar në QKUK. Dy të dyshuar janë arrestuar dhe me vendim të prokurorit janë liruar në procedurë të rregullt, ndërsa dy të dyshuarit tjerë gjenden në arrati”, thuhet në njoftimin e policisë.
Nga QKUK-ja është bërë e ditur se viktima është jashtë rrezikut për jetë.
“Po, një i plagosur ka ardhur, lëndime me armë zjarri, gjendja e tij është stabile, është në trajtim stabil, mandej vendosim nëse do të lirohet apo çfarë do të ndodhë. Jashtë rrezikut për jetë ka marrë plagë në këmbë”, ka thënë për Portalin Dukagjini, doktori kujdestar, Ejup Govori.
Ndërkaq, sipas disa dëshmitarëve që kanë folur për Dukagjinin në kushte anonimiteti, të dyshuarit kanë gjuajtur nga vetura.