Një numër i madh i qytetarëve serbë nga komunat veriore të Kosovës, të martën e 31 majit janë nisur drejt Beogradit për t’i dhënë mbështetje presidentit të Serbisë, Aleksandër Vuçiq.
Kjo për shkak se pas fitores së tij në zgjedhjet e prillit, Vuçiq do të bëjë betimin si president i Serbisë.
Siç shkruan e përditshmja serbe “B92”, me pankarta në duar, serbët e Kosovës janë nisur drejt Serbisë në orët e hershme të së martës.
“President, e gjithë Kosova janë më ty”, “President faleminderit që po e mbron Kosovën”, “Derisa të jetë president Vuçiq, do të ketë serbë në Kosovë”, ishin disa nga pankartat e tyre.
Serbët nga Kosova pritet të mblidhen para kuvendit të Serbisë, në kohën kur Vuçiqi do të bëjë betimin.
Ata janë shoqëruar edhe nga përfaqësuesit e tyre politikë, ata të Listës Serbe.
Ndryshe, sipas rezultateve preliminare të Komisionit Zgjedhor në Serbi, Vuçiç, kishte fituar zgjedhjet presidenciale të tre prillit duke marrë 58.9 për qind të votave.
I dyti, sipas KQZ-së serbe, u radhit kundërkandidati i Vuçiç-it, Zdravko Ponos, me 18.32 për qind të votave.
Partia e Aleksandër Vuçiç, ka fituar bindshëm edhe zgjedhjet parlamentare, duke marrë 42.97 për qind të votave.
Ndërsa, Partia “Të Bashkuar për Fitore” doli e dyta me 13.57 për qind të votave, kurse “Ivica Daçiq – Kryeministër” e treta me 11.57 për qind.
“Koalicioni i Shqiptarëve” ka arritur të sigurojë 0.26 për qind të votave.