Të hënën e një gushtit, në pikën kufitare Dheu i Bardhë, po vazhdon zbatimi i masës së reciprocitetit për pajisje me dokumentin hyrje-dalje, i cili ka afat vlefshmërie 90 ditë brenda territorit të Republikës së Kosovës.
Ndërkaq, në orët e mëngjesit, pas situatave tensionuese të krijuara mbrëmë në Veri të Mitrovicës, zyrtarët policorë në pikën kufitare në Merdar kanë thënë se pajisja e shtetasve serbë me fletë-deklarime për hyrje-dalje në Kosovë do të vazhdojë deri në një vendimmarrje politike, transmeton KP.
Ndërkaq, kanë filluar të largohen bllokadat nga pikat kufitare në Jarinjë dhe Bërnjak, të cilat ishin të vendosura që nga mbrëmja e së dielës, nga serbët lokalë të komunave veriore serbe.
Në pikën kufitare të Jarinjës, tashmë janë larguar edhe bllokadat e fundit që ishin të vendosur aty.
Ky veprim vjen pasi Qeveria e Kosovës, ka marrë vendim që të shtyhen masat për reciprocitet me Serbinë për cështjen e targave dhe letërnjoftimeve.
Gjatë kohës kur po largohen barikadat, gjendjen kishte dalë ta shohë edhe deputeti i Listës Serbe, Igor Simiq, i cili nuk pranoi të prononcohej për media, madje kolegët e tij afër i kanë larguar mediat e pranishme me forcë.
Ndryshe, pak para mesnatës të së hënës, kërkesën për shtyrjen e vendimit për reciprocitet me Serbinë e ka bërë ambasadori i SHBA-së në Kosovë, Jeff Hovenier.
Pas konferencës së ambasadorit amerikan, Qeveria e Kosovës ka bërë të ditur se i ka pezulluar vendimet për reciprocitet për një muaj (1 shtator 2022), me kusht që do të hiqen barrikadat e vendosura në pikat kufitare.