Autobusët e kryeqytetit, nuk do t’i kthehen punës as të hënën, e 1 dhjetorit.
Drejtori i Trafikut Urban, Gashi, ka njoftuar se sigurimi i fondeve për pagesa dhe stabiliteti i shërbimeve të transportit urban janë dy kërkesat kryesore të grevës së nisur nga ndërmarrja.
“Greva fillon nesër në orën 10:00 dhe do të zgjasë deri në orën 12:00. Me autobus do të bartim punëtorët tanë deri te objekti i Komunës. Greva do të vazhdojë deri në momentin kur mjetet të alokohen në xhirollogarinë e Trafikut Urban”, tha Gashi për Radio Kosovën.
Ai ka shtuar se vendimi për alokimin e mjeteve u mor të premten, por ende nuk ka arritur për verifikim në Ministrinë e Financave.
“Nëse nuk ndodh kjo, greva do të vazhdojë ditët në vijim, varësisht nga kushtet që do të kemi,” theksoi Gashi.
Drejtori shprehu keqardhje për shqetësimet e qytetarëve dhe premtoi se shërbimi i transportit publik do të rikthehet menjëherë sapo të alokohen mjetet.
“Ky vendim ka mundur të merrej edhe muaj më parë, por nuk u mor. Shpresojmë që situata e tillë të mos përsëritet në të ardhmen”, ka theksuar ai.
Zyrtarët e Trafikut Urban konfirmuan se të gjitha biletat mujore të paguara do të kompensohen për ditët kur qytetarët nuk kanë mundur të përdorin shërbimin.
Kuvendi Komunal i Prishtinës, në një seancë të jashtëzakonshme më 27.11.2025, votoi për bartjen e mjeteve nga viti 2024 në vitin 2025, me mbështetjen e shumicës së asamblistëve, 38 vota pro, asnjë kundër dhe një abstenim.
Ndërmarrja Trafiku Urban ka njoftuar se vështirësitë financiare dhe mungesa e karburantit kanë detyruar ndërprerjen e qarkullimit të të gjitha linjave që nga e hëna, 24 nëntor.
Kryetari i Prishtinës, Përparim Rama, ka akuzuar Qeverinë në detyrë se ka bllokuar mjetet e të hyrave vetanake të kryeqytetit.Por ministri në detyrë i Financave, Hekuran Murati, ka thënë se kryetari Përparim Rama e ka futur Komunën në obligime pa mbulesë për shkak të vendimeve elektorale.