Kryeministri izraelit, Benjamin Netanyahu, po përgatitet për një ndërhyrje të madhe ushtarake në Gaza dhe në Bregun Perëndimor, teksa gjendja humanitare në territorin palestinez vazhdon të përkeqësohet.
Vetëm në një ditë, 66 palestinezë u vranë nga sulmet ajrore izraelite, mes tyre gra, fëmijë dhe persona që prisnin ndihma. Në terren, uria dhe kequshqyerja po përhapen me shpejtësi.
Në planin politik, qeveria izraelite po synon të marrë kontrollin administrativ të disa zonave të Bregut Perëndimor ku ka përqendrim të madh kolonësh, duke goditur rëndë perspektivën e krijimit të një shteti palestinez.
Ky veprim shihet si kundërpërgjigje ndaj përpjekjeve të disa shteteve perëndimore për të njohur Palestinën në Kombet e Bashkuara.
Ndërkohë, Shtetet e Bashkuara kanë tërhequr vizat për disa zyrtarë palestinezë, përfshirë presidentin Mahmud Abbas (Abu Mazen), një hap që ka nxitur reagime kritike nga Bashkimi Evropian.
Mediat raportojnë se Netanyahu ka mbledhur qeverinë në mënyrë të fshehtë për shkak të kërcënimeve nga rebelët Houthi, pas një sulmi ajror që vrau disa prej drejtuesve të tyre.
Operacionet ushtarake në Gaza vazhdojnë pa ndërprerje, pavarësisht se Hamasi ka pranuar një armëpushim të përkohshëm.
Sipas burimeve ndërkombëtare, Netanyahu po synon ta zgjerojë ofensivën, ndërsa presidenti amerikan Donald Trump ka kërkuar një shtyrje prej dy javësh të operacionit në veri të Gazës.