Fillimisht, Gjykata Themelore në Ferizaj ka njoftuar se i është caktuar masa e paraburgimit prej një muaji, ndaj tre të miturve që dyshohen për shkaktimin e zjarrit në Gjykatën e Kaçanikut më 13 mars.
“Pas mbajtjes së seancës dëgjimore dhe analizimit të shkresave të lëndës, gjyqtari i procedurës paraprake i Departamentit për të Mitur, ka vlerësuar se ekziston dyshimi i bazuar, se të miturit me datë 13 mars 2024, rreth orës 03:42, me qëllim të dëmtimit me dashje kanë ndezë zjarrin në objektin e Gjykatës Themelore në Ferizaj – Dega në Kaçanik, ashtu që pas planifikimit paraprak, përmes shkallëve emergjente depërtojnë në katin e dytë ku me shishe hedhin benzinë në dy zyre të gjyqtarëve penalist dhe në korridor, pastaj nga shkallët emergjente ndezin zjarrin, ku për pasojë shpërthen zjarri dhe dy zyrat e gjyqtarëve dëmtohen tërësisht e po ashtu edhe korridori, kurse të dyshuarit tjerë bëjnë roje përreth gjykatës”, thuhet në komunikatën për media të Gjykatës Themelore të Ferizajt.
Gjyqtari i procedurës paraprake, kërkesën e prokurorit të shtetit për caktimin e masës së paraburgimit kundër tre të dyshuarve të mitur e ka aprovuar si të bazuar konform dispozitave të KPPRK-së, dhe të njëjtëve i është caktuar masa e paraburgimit në kohëzgjatje prej një (1) muaj.
Me këtë rast palët njoftohen se ankesa kundër këtij aktvendimi nuk e shtynë ekzekutimin e tij.
Ndërsa, pak më vonë Gjykata sërish njoftoi se edhe ndaj një të dyshuari tjetër i është caktuar masa e paraburgimit prej një muaji.
Më 13 mars të këtij viti, është përfshirë nga zjarri objekti i Gjykatës Themelore në Ferizaj – Dega në Kaçanik.
Lexo më shumë: Përfshihet nga zjarri objekti i Gjykatës në Kaçanik, dyshohet për zjarrvënie të qëllimshme
Përmes një komunikate për media, Gjykata Themelore në Ferizaj njoftoi se zjarri kishte kapluar një pjesë të dy zyrave të kësaj gjykate.
Lexo më shumë: Gjykata në Ferizaj për zjarrin në degën e saj në Kaçanik: Zjarrfikësit dhe policia janë në vendngjarje
Në vendin e ngjarjes kishin dalë menjëherë ekipi i zjarrfikësve dhe policia, të cilët kishin lokalizuar zjarrin dhe kishin ndërmarrë masat e nevojshme.