Prokuroria Speciale e Republikës së Kosovës (PSRK), këtë të mërkurë, ka ngritur aktakuzë në Gjykatën Themelore në Prishtinë, ndaj zëdhënësit të LVV-së, Arlind Manxhuka dhe ish-asamblistit të po kësaj partie, Egzon Azemit.
Po ashtu aktakuzë është ngritur edhe ndaj dy personave me inicialet Q.E dhe E.Z.
Sipas njoftimit të PSRK-së, thuhet se aktakuza kundër dy të pandehurve Arlind Manxhuka dhe Egzon Azemi është ngritur për veprën penale “Nxitja e përçarjes dhe mosdurimit”.
Ndërsa, kundër të pandehurve me inicialet Q.E dhe E.Z është ngritur aktakuzë për veprën penale “Kanosja”, pasi të njëjtit me dashje kanë kanosur të dëmtuarit me inicialet A.Sh dhe M.B.
“Gjithashtu, të pandehurit AM dhe E.A. duke keqpërdorur pozitën e tyre zyrtare nëpërmjet rrjetit social ‘Facebook’, me dashje kanë përhapur dhe nxitur urrejtje e mos durim ndaj të dëmtuarve, prokurorit A.Sh dhe gjyqtarit M.B, lidhur me një vendim për ndryshimin e masës së paraburgimit kundër të dyshuarit D.P”, thuhet në komunikatën për media.
Prokurori i Shtetit, me rastin e ngritjes së aktakuzës, i ka propozuar Gjykatës që të pandehurit të shpallen fajtorë, si dhe të dënohen sipas ligjit për veprat penale të cilat u vihen në barrë.