Kompania për Distribuimin e Energjisë Elektrike në Kosovë (KEDS) ka njoftuar se ka angazhuar dhjetëra punëtorë që ta rikthejë në punë sa më shpejt nënstacionin Prishtina 3 të KOSTT-it.
Që nga mbrëmja e së mërkurës, kjo zonë e Prishtinës ka mbetur pa rrymë, duke u afektuar rreth 10 mijë konsumatorë.
“Ekipet tona tashmë kanë përgatitur asetet e KEDS-it dhe jemi në pritje të përfundimit të punimeve nga ana e KOSTT-it, të cilët gjithashtu janë në vlugun e punës që ta rikthejnë sa më shpejt energjinë elektrike”, thuhet në njoftim.
Të mërkurën, nënstacioni elektrik “Prishtina 3” është kapluar nga zjarri dhe si pasojë qytetarët që furnizohen nga kjo pikë kanë mbetur pa energji elektrike, teksa KOSTT-i ka kërkuar mirëkuptim prej qytetarëve të afektuar, deri në sanimin e avarisë.