Një zyrtar policor ka goditur për vdekje një këmbësor në rrugën “Ismajl Kryeziu” në Prizren të premten.
Viktima që nuk është identifikuar ende nga policia ka humbur jetën në vendin e ngjarjes teksa i dyshuari ishte jashtë detyrës zyrtare dhe duke lëvizur me veturë private, njofton Dukagjini.
Rastin për Dukagjinin e ka konfirmuar zëdhënësi i Policisë në Prizren, Faton Alija.
“Sot rreth orës 18:12, në rrugën “Ismajl Kryeziu” në Prizren, ka ndodhur një aksident trafiku – goditje e këmbësorit, i cili fatkeqësisht ka përfunduar me fatalitet. Menjëherë pas marrjes së informatës, në vendin e ngjarjes kanë dalë njësitë policore përkatëse si dhe eprorët policorë. Nga informacionet e para është kuptuar se viktima është një person i gjinisë mashkullore, i moshuar, i cili deri në këtë fazë është ende i paidentifikuar”.
“Ndërsa, i dyshuari në këtë rast është një zyrtar policor nga Prizreni, i cili në momentin e aksidentit ka qenë jashtë detyrës zyrtare dhe ka qenë duke lëvizur me veturë private. I dyshuari aktualisht ndodhet në Stacionin Policor të Prizrenit. Për veprimet e mëtejshme administrative dhe penale do të koordinohemi me Inspektoratin Policor të Kosovës (IPK) dhe Prokurorin Kujdestar, për çka do të njoftoheni me kohë”, deklaroi Alija.
Po ashtu lidhur me rastin janë njoftuar Prokurori i Shtetit dhe Inspektorati Policor i Kosovës, të cilët janë duke u marrë me procedurat e nevojshme hetimore.