Të hënën, kompania shtetërore ruse e energjisë ka thënë se do të reduktojë më tej rrjedhat e gazit përmes tubacionit “Rrjedhja Veriore 1” nga e mërkura, pasi ndalon një tjetër turbinë për riparime.
Tubacioni është një arterie jetike që lidh rezervat e mëdha të gazit të Rusisë me Evropën nëpërmjet Gjermanisë.
Kadri Simson, Komisionerja evropiane për Energji para një takimi me ministrat e energjisë të BE-së në Bruksel ka thënë se njoftimi i fundit i Gazprom për të reduktuar më tej flukset përnes gazsjellësit është “një hap i motivuar poilitikisht”, raporton CNN.
Simson ka thënë: “Nuk ka asnjë arsye teknike për të bërë këtë. Ky është një hap i motivuar politikisht dhe ne duhet të jemi gati për këtë”.
Komisionerja evropiane për Energji ka thënë se pikërisht për këtë arsye, ulja parandaluese e kërkesës së tyre për gaz është një strategji e mençur.
“Ne duhet të kujdesemi për gatishmërinë tonë, ne duhet ta trajtojmë këtë krizë tani dhe së bashku. Dhe duke e bërë këtë, ne do të reduktojmë kërkesën tonë paraprakisht,” vazhdoi ajo.
Simson shtoi se ajo pret që ministrat e BE të kenë “një marrëveshje politike” deri në fund të së martës.