Nënkryetarja e Lidhjes Demokratike të Kosovës, Hykmete Bajrami, ka reaguar pas postimit të Hekuran Muraatit, ku ky i fundit deklaronte se “opozita bllokoi shtetin”.
Bajrami ka kritikuar ashpër kryeministrin Albin Kurti dhe qeverinë e tij, duke e quajtur një “mashtrim të ri”.
Ajo thekson se opozita nuk ka numra në Kuvend dhe nuk është pjesë e Qeverisë, prandaj nuk mund të “bllokojë” vendin.
Bajrami ka theksuar se opozita nuk ka penguar as ndërtimin e çerdheve, as lirimin e çmimit të energjisë, as heqjen e TVSH-së nga produktet bazë, apo ndërtimin e rrugëve magjistrale.
Sipas saj, qytetarët janë ata që dinë kush ka penguar zhvillimin e vendit dhe kujt i takon përgjegjësia për vendimmarrjen.
“Se kush doli i pari në zgjedhjet e 9 shkurtit, dhe kush e mbajti vendin të bllokuar për 9 muaj duke e çuar sërish në zgjedhje, qytetarët e dinë shumë mirë. Mos i nënvlerësoni qytetarët! Më 28 dhjetor, vendi çlirohet nga mashtruesit. Ani kishe patriota!!!”, ka shkruar ajo.