Presidentja e Republikës së Kosovës, Vjosa Osmani, krahas presidentëve të shteteve të rajonit do të marrë pjesë në takimin e 11-të të procesit Bërdo-Brione.
Zyra e Presidentes ka bërë të ditur se temat të cilat parashihen të diskutohen në këtë takim përfshijnë perspektivën e integrimit evropian për vendet aspiruese të Ballkanin Perëndimor, të cilat i përmbushin kushtet për integrim dhe të cilat i bashërendojnë politikat me ato të Bashkimit Evropian, tejkalimin e sfidave të përbashkëta si pasojë e agresionit të paprovokuar të Rusisë në Ukrainë, duke përfshirë këtu edhe krizën energjetike dhe sigurinë ushqimore. Njëherësh, përkushtimin për demokraci, paqe dhe dialog.
Qëndrimet e Republikës së Kosovës do të paraqiten nga Osmani, duke përfshirë këtu edhe thirrjen për liberalizimin e vizave për qytetarët e Kosovës, si dhe njëherësh, avancimin e rrugës euroatlantike.
Takimi i Procesit Bërdo-Brione do të mbahet në Bërdo afër Kranjit në Slloveni, nën udhëheqjen e presidentit të Sllovenisë, Borut Pahor dhe presidentit të Kroacisë, Zoran Milanović.