Presidentja e Kosovës, Vjosa Osmani, ka falënderuar sportistët dhe sportistet të cilët kishin marrë pjesë në Lojërat Mesdhetare, duke thënë se ata po kthehen triumfues në Kosovë.
“Me gjashtë medalje, tri të arta dhe tri të bronzta, sportistët tanë po kthehen triumfues në Kosovë” ka thënë Osmani.
Po ashtu, Osmani është shprehur se sportistët dhe sportistet janë duke u shfaqur në mënyrë fantastike.
Ndërsa, ajo ka falënderuar edhe për imazhin që i kanë dhënë Kosovës në botë, duke u shprehur se Kosovën e nderojnë vajzat dhe djemtë, si sportistët të cilët triumfuan në garën e Lojërave Mesdhetare.
“Kosovën e nderojnë bashkërisht vajzat dhe djemtë tanë si: Distria, Loriana, Laura, Flaka, Akili, Shpejtimi e shumë të tjerë” është shprehur Osmani në rrjetin social Facebook.
Kosova në Lojërat Mesdhetare “Oran 2022”, u përfaqësua nga 39 garues në 13 sporte të ndryshme, dhe ka siguruar gjashtë medalje.
“Dardanët” janë treguar tejet të suksesshëm pasi përmbyllën Lojërat Mesdhetare duke u renditur në vendin e 16-të.
Pesë medalje i siguroi sporti i xhudos dhe një ai i boksit, në një total prej tri të artave dhe tri të bronztave.
Distria Krasniqi, Loriana Kuka dhe Laura Fazliu fituan medaljet e arta në këtë garë prestigjioze, kurse Akil Gjakova, Flaka Loxha dhe Shpejtim Bajoku fituan medaljet e bronzta.
Kosova e siguron edhe medaljen e gjashtë në Lojërat Mesdhetare “Oran 2022”