Presidentja Vjosa Osmani, teksa ka folur për 25-vjetorin e çlirimit të Kosovës dhe intervenimin e NATO-s, ka thënë se gjithmonë bota do ta kujtojë kumbimin e fjalëve të ish-kryeministrit britanik, Tony Blair, kur bënte thirrje për t’u ndalur krimet serbe; “Kjo është thjesht gjëja e duhur për ta bërë”.
Në një konferencë për medie me Blairin, Osmani i është drejtuar ish-kryeministrit britanik se ka qenë hero i popullit të Kosovës gjatë luftës dhe se tash është hero i paqes për vendimin e drejtë që ka marrë për ta ndihmuar popullin.
“Në vitin ’99 kur u radhite në anë e së drejtës dhe në anën e popullit dhe në anën e popullit për të qenë e ilirë. Në vitin ’99 roli i juaj si kryeministër britanik gjatë ndërhyrjes së NATO-s në Kosovë ishit vendimtar, ndaj sikurse atëherë që ishit hero i popullit të Kosovës si dhe hero i lirisë e demokracisë, edhe sot jeni hero i paqes për vendimin e drejtë të asaj kohe. Dhe të gjithë përkrahjen që ia keni dhënë kohës gjatë këtyre viteve”, ka thënë Osmani.
Blair, i cili ishte kryeministër gjatë kohës së luftës në Kosovë, si një nga zërat më të fuqishëm pro ndërhyrjes së NATO-s, argumentonte atëbotë se komuniteti ndërkombëtar kishte një detyrim moral për të ndërhyrë dhe për të ndaluar katastrofën humanitare që po ndodhte.
E për këtë, Osmani e ka falënderuar ish-kryeministrin, teksa ka theksuar se populli e vlerëson dhe e çmon për kontributin e dhënë për lirinë e Kosovës.