Presidentja e Kosovës, Vjosa Osmani, e ka përkujtuar heroin Agim Ramadani në 24-vjetorin e rënies së tij.
Osmani ka thënë se liria e vendit mban vulën e Agim Ramadanit dhe heronjve të tjerë.
“24-vjet më parë Agim Ramadani u përjetësua në hero, u bë lajmëtar i lirisë bashkë me luftëtarët e UÇK-së, vullneti dhe guximi i të cilëve theu kufirin ndërmjet Kosovës e Shqipërisë”, ka thënë Osmani.
Presidentja e vendit ka shtuar se komandanti Agim Ramadani ishte njeriu i penës, brushës e pushkës.
Sipas saj, ai është personifikim i lirisë, rrugës deri te ajo, por edhe lavdisë së përhershme.
“Liria jonë mbanë vulën e Agim Ramadanit dhe heronjve të tjerë, të cilët e përmbushën idealin e brezave, mbrojtën dinjitetin, kthyen shpresën dhe përcaktuan rrugëtimin e shtetit të Kosovës”.
Po ashtu, Osmani ka theksuar se luftëtarët do të përkujtohen përherë duke përmbushur çdo ditë testamentin e tyre për Republikën.
“Përkulemi me respekt para heroizmit të Agimit me bashkëluftëtarë, do t`i kujtojmë përherë dhe do ta përmbushim çdo ditë testamentin e tyre për Republikën”.
Agim Ramadani u lind në Zhegër të Gjilanit, më tre maj 1963. Shkollimin fillor e kreu në vendlindje, të mesmen në Gjilan në vitin 1980, ndërsa Akademinë ushtarake-drejtimi i komunikacionit në Zagreb të Kroacisë.
Pas thyerjes së këtij kufiri, në pjesën e Kosovës, te vendi i quajtur Rrasa e Zogut, ai ra heroikisht duke mos vdekur kurrë. Po ashtu, njihet me emrin konspirativ-Katana.
Agimi la pas vetes tre fëmijë, djemtë Jetonin dhe Edonin dhe vajzën Lorinën.