Presidentja e Kosovës, Vjosa Osmani, ka thënë se është shumë e rëndësishme që do të kenë mundësi të marrin pjesë në organizime bashkë me liderë të tjerë botërorë, në kuadër të sesionit të 78-të të Asamblesë së Kombeve të Bashkuara.
Ajo, në një adresim drejtpërdrejt në Facebook, ka thënë se takimi më i rëndësishëm është ai me presidentin e SHBA-së, Joe Biden, i cili do të organizojë pritje për liderët që marrin pjesë në kuadër të këtij sesioni.
“Është shumë me rëndësi që do të kemi mundësi që të marrim pjesë në organizime bashkë me lider të tjerë botërorë, takimet do të nisin pas gjysmë ore. Mirëpo më e rëndësishmja do të jetë pritja e organizuar nga presidenti Biden, ku do të kem mundësi që ta falënderoj në emër të popullit të Republikës së Kosovës, për aleancën tonë të fuqishme dhe për mbështetjen e vazhdueshme të Shteteve të Bashkuara të Amerikës”, u shpreh Osmani.
Në takime bilaterale me liderë të tjerë dhe në organizime diskutive të tjera, Osmani ka theksuar se do ta përçojë zërin e popullit të Kosovës dhe qëndrimet e Republikës së Kosovës.
“Jo vetëm për zhvillimet rajonale, por si mund të jetë Kosova një faktor që kontribuon edhe për sfidat e tjera globale me të cilat bashkarisht po merremi”, shtoi ajo.
Në agjendën e Osmanit do të jenë edhe një sërë aktivitetesh të përbashkëta me mërgatën shqiptare në Amerikë.