Presidentja e Kosovës, Vjosa Osmani, ka marrë pjesë në Samitin Ndërkombëtar të Ushqimit në Iowa, Shtetet e Bashkuara të Amerikës, ku ka shprehur vendosmërinë e saj për të thelluar marrëdhëniet mes dy vendeve në fushën e bujqësisë.
Ajo ka theksuar se marrëdhënia midis Kosovës dhe Iowa-s është e ndërtuar mbi vlera të përbashkëta dhe vlerësimin e potencialit të bujqësisë për të përmirësuar jetën e njerëzve.
Presidentja Osmani ka theksuar se ky partneritet nuk është vetëm simbolik, por përfshin sfida dhe mundësi në fusha të ndryshme, duke përfshirë mbrojtjen, tregtinë, arsimin dhe shkëmbimin kulturor.
“Duke punuar së bashku për të hapur rrugën përpara për një botë ku askush nuk shkon në shtrat i uritur. Zonja dhe zotërinj, unë jam këtu jo vetëm si presidente e Republikës së Kosovës, por edhe për të shprehur ndjenjën e vlerësimit të popullit tim për motërzimin e jashtëzakonshëm ndërmjet Kosovës dhe IOWA-s. Miqësia jonë është e rrënjosur në vlerat e përbashkëta dhe vlerësimin e përbashkët për potencialin e jashtëzakonshëm të bujqësisë në ndryshimin e jetës së njerëzve për të mirë”, është shprehur Osmani.
Ajo ka shprehur gatishmërinë për të ndarë njohuri dhe praktika të mira me Iowa-n dhe për të ndihmuar në ndërtimin e një ure bashkëpunimi që forcon më tej lidhjet mes dy vendeve.
“Partneriteti ynë shtet-motër nuk është vetëm simbolik, ky partneritet shtrihet përtej bujqësisë së tyre, duke u fokusuar edhe në mbrojtje, tregti, arsim dhe shkëmbim kulturor. Dhe, ndërsa ndajmë përvojat, njohuritë dhe praktikat më të mira, ne ndërtojmë një urë mirëkuptimi dhe bashkëpunimi që forcon më tej lidhjet mes nesh. Kosova dhe IOWA mund të jenë milje larg njëra-tjetrës, por ne jemi të bashkuar nga besimet tona dhe vlerësimi për tokën tonë. Për popullin e Kosovës, bujqësia nuk është vetëm një sektor tjetër”, ka theksuar ajo, transmeton KP.
Presidentja Osmani gjithashtu ka bërë të ditur se Kosova synon të rrisë numrin e bizneseve bujqësore, shprehur interesin për zhvillimin e këtij sektori në vend.
Osmani po qëndron për vizitë zyrtare disaditore në Iowa të Shteteve të Bashkuara të Amerikës.
Ajo është pritur nga guvernatorja Kim Reynolds dhe ka zhvilluar një sërë takimesh të tjera.