Të dielën e 25 shkurtit është mbajtur ceremonia e ndarjes së çmimeve në fushën e sportit për Laureatët e vitit 2022 të Komitetit Olimpik.
Në këtë rast, presidentja e Kosovës, Vjosa Osmani, ka uruar ata që kanë marrë këto çmime, duke theksuar se është krenare për përkushtimin dhe angazhimin e tyre ndaj sportit dhe Kosovës, teksa ka shtuar se ata janë shembull për brezat e ardhshëm.
“Ju na keni frymëzuar të gjithëve me talentin tuaj, përkushtimin dhe angazhimin e palëkundur ndaj sportit dhe ndaj shtetit tonë. Ju jeni shembull për brezat e ardhshëm, ndaj na keni bërë vazhdimisht krenarë”, ka shkruar Osmani në Facebook.
Më e mira te femrat u shpall xhudistja, Distria Krasniqi, ndërsa në kategorinë e meshkujve këtë çmim e fitoi boksieri, Shpetim Bajoku.
Çmimi i trajnerit edhe këtë viti i takoi Driton Kukës.
Përfaqësuesja e vitit te meshkujt u shpall ajo e futbollit, ndërsa te femrat, përfaqësuesja më e mirë ishte e hendbollit.
Xhudistit Dardan Cena, i takoi çmimi shpresa olimpike te djemtë, ndërsa skitares Kiana Kryeziu, te vajzat.
Me çmime speciale janë nderuar boksierja Donjeta Sadiku, dhe futbollisti Vedat Muriqi.
