Presidenja e Kosovës, Vjosa Osmani ka thënë se presidenti i Serbisë, Aleksandër Vuçiq po përpiqet të shkatërrojë gjithçka që është arritur së bashku me Shtetet e Bashkuara të Amerikës (ShBA) dhe Bashkimin Evropian (BE), për paqen, lirinë dhe bashkëjetesën mes bashkësive të ndryshme.
Përmes një postimi në platformën “X”, Osmani ka thënë se këto veprime të presidentit serb, vijnë pas dy dekadave kur Sllobodan Millosheviq kishte shkatërruar Kroacinë, Bosnjën dhe Hercegovinën dhe Kosovën.
“Ne do të punojmë me aleatët tanë dhe nuk do të lejojmë që këto arritje të zhbëhen. Liria do të mbizotërojë!”, ka shkruar Osmani.
Over 2 decades after Milošević ravaged 🇭🇷🇧🇦🇽🇰, his lieutenant Vučić is now trying to undo everything we’ve achieved together w/🇺🇸🇪🇺: peace, freedom & coexistence among different communities. We’ll work with our allies &won’t let these achievements be undone. Freedom will prevail!
— Vjosa Osmani (@VjosaOsmaniPRKS) September 30, 2023
Së fundmi, Serbia ka vendosur forca ushtarake në kufirin me Kosovën.
Koordinatori për komunikime strategjike në Këshillin e Sigurisë Kombëtare të SHBA-së, John Kirby, shprehu shqetësimin e Uashingtonit, për siç tha, “dislokimin e madh” të trupave të Serbisë përgjatë kufirit me Kosovën.
“Ne do të monitorojmë dislokimin e madh serb përgjatë kufirit me Kosovën. Ne i bëjmë thirrje Serbisë të tërheqë forcat nga kufiri dhe të vazhdojë të ulë tensionet”, tha Kirby gjatë një bisede me gazetarë më 29 shtator.
Lexo dhe: ShBA i kërkon Serbisë të tërheqë trupat ushtarake nga kufiri me Kosovën
Ai tha se gjatë bisedës që sekretari amerikan i Shtetit, Antony Blinken, zhvilloi më herët gjatë ditës me presidentin serb, Aleksandar Vuçiq, ka kërkuar që Serbia të ulë tensionet.
Kirby tha se incidentet e dhunshme, sikurse ai i majit ndaj pjesëtarëve të KFOR-it, por edhe ai në Banjskë, paraqesin rrezik jo vetëm për personelin e sigurisë së Kosovës, por edhe të NATO-s.