Ramush Haradinaj, kryetar i Aleancës për Ardhmërinë e Kosovës (AAK), ka shprehur shqetësimin e tij mbi situatën e krijuar nga mosrealizimi i pagave për sektorin publik, duke e quajtur këtë veprim një shkelje të rëndë të të drejtave të njeriut.
Në një postim në Facebook, Haradinaj ka theksuar se mijëra punëtorë po përballen me shpërfillje skajshme nga ana e Qeverisë.
Ai ka kërkuar thirrjen urgjente të një seance të jashtëzakonshme të Kuvendit të Kosovës për të diskutuar amandamentimin e Ligjit për shërbyesit civilë, që do të mundësonte zgjidhjen e menjëhershme të këtij problemi.
“Çdo përpjekje tjetër është shkelje ligjore dhe keqpërdorim i të drejtës së mbi 80 mijë njerëzve për të realizuar të drejtën e tyre në pagë”, ka theksuar Haradinaj.
Sipas tij, AAK-ja do të kërkojë që kjo çështje të shqyrtohet qysh nga kjo ditë e hënë.
Që nga e hëna, zyrtarët publikë në Kosovë kanë mbetur pa paga për shkak të skadimit të mandatit të ushtruesit të detyrës së Drejtorit të Përgjithshëm të Thesarit.
Ekzekutimi i pagave për zyrtarët publikë, si dhe për skemat sociale, pritej të bëhej më 30 shtator, por pa nënshkrimin e ushtruesit të detyrës, nuk mund të bëhet asnjë dalje e parasë publike nga llogaritë e shtetit.