Ndonëse ekzekutivi e ka cilësuar vitin 2022 si vit i arritjeve dhe sfidave, kjo nga partitë opozitare po konsiderohet ndryshe.
Ato e kanë quajtur të paaftë dhe kompetente Qeverinë e Kosovës, duke thënë se Qeveria ka dështuar plotësisht në vitin 2022.
Kjo sepse sipas tyre, nuk është ofruar zgjidhje për qytetarët në krizën ekonomike dhe energjetike.
Deputeti i Partisë Demokratike të Kosovës (PDK), Rashit Qalaj, ka thënë se Qeveria nuk ka bërë asnjë punë pozitive gjatë vitit 2022.
“Jemi ballafaquar me probleme të shumta që kanë të bëjnë me krizën e madhe që ka kapluar vendin tonë dhe e cila ka prekur gjitha shtresat. Kemi pasur probleme dhe po kemi probleme me energjinë, me çmimet që po ngritën pafundësisht. Kemi pasur një degradim të situatës ekonomike të popullatës. Sot qytetarët e Kosovës janë shumë më të varfër sesa kanë qenë para 1 viti. Po i përmendi këto se kemi një qeveri që nuk ka bërë asnjë reagim, ndërhyrje që këto sadopak të zbuten. Mendoj se Qeveria e Kosovës nuk ka bërë asnjë punë pozitive gjatë këtij 1 viti. As në ëndërr nuk kisha mundur të parashoh një Qeveri kaq të dobët dhe jokompetente në raport me mandatin që janë duke ushtruar”, është shprehur Qalaj.
Edhe deputeti i Aleancës për Ardhmërinë e Kosovës, Pal Lekaj, ka adresuar kritika të ashpra ndaj punës së Qeverisë përgjatë vitit 2022.
“Nuk ka pasur ndonjë vendim që ka shkuar në favor të qytetarëve, qoftë zhvillimit ekonomik, qoftë krizës energjetike, apo krizën në veri që janë thelbësore për një shtet. Kjo Qeveri do të mbahet mend për këtë vit vetëm për qëndrime ad-hoc dhe për krijimin e krizave. Edhe ato kriza që i ka krijuar nuk i ka zgjidh në mënyrën e duhur. Po e marrim krizën energjetike, s’ka pasur ndonjë përmirësim apo alternativë. Përmbi gjashtë herë Kuvendi ka shpallur krizë emergjente dhe këtë drejtim çështja ka mbetur aty ku ka qenë”, ka thënë ai, shkruan KP.
“Po ashtu sa i përket zhvillimit ekonomik kemi ngadalësim, s’ka investime të huaja, s’ka punësim, edhe pse këta e proklamojnë kah 40 mijë të punësuar që është një mashtrim i Qeverisë Kurti. Nëse e shikojmë si tërësi, edhe ekonomia familjare ka rënë tepër, ndërmarrjet e mesme nuk janë zhvilluar, mos të flasim për ndërmarrje të mëdha që po thuajse janë para kolapsit. Mund të them si opozitë dhe deputet i Kuvendit të Kosovës, mendoj se jemi larg asaj që ka premtuar Kurti, po del se të gjitha kanë qenë mashtrim”, theksoi Lekaj.
Në anën tjetër, analisti politik, Gazmir Raci, ka thënë se Qeveria e Kosovës gjatë vitit 2022, është ballafaquar me sfida më shumë, si pasojë e ndikimit të luftës në Ukrainë.
“Janë disa sfida që jemi ballafaquar si Kosovë gjatë këtij viti. Sfida e parë kishte të bënte me luftën e paprovokuar në Ukrainë dhe ndikimin që pati direkt në rritjen e inflacionit dhe pastaj në rritjen e çmimeve dhe të jetesës edhe të qytetarëve të Kosovës. Qeveria u mundua që përmes pakove të ringjalljeve ekonomike të ndihmojë, sidomos shtresën sociale. Kjo ishte një sfidë që mori energjinë e saj. Pastaj edhe sfida e dialogut dhe raporteve të pazgjidhura ende me Serbinë e kanë bërë Qeverinë e Kosovës më të koncentruar në këtë dimension. Ka pasur fusha, ku nuk kemi pasur progres të theksuar, sidomos në sektorin e shëndetësisë, kishim probleme të theksuara gjatë tërë vitit”, deklaroi Raci.
Ndryshe nga të gjitha këto qëndrime, është shprehur kryeministri i Kosovës, Albin Kurti, i cili vitin 2022 e ka quajtur të suksesshëm.
“Ne jemi shumë të lumtur që do të kemi një rritje ekonomike prej 4 për qind të Bruto Produktit Vendor, pasi të hiqet inflacioni. Vjet e kemi pasur 10.7 për qind të Bruto Produktit Vendor dhe janë rritur eksportet për 22 për qind sivjet, janë rritur të hyrat doganore për mbi 11 për qind, janë rritur të hyrat tatimore për gati 22 për qind dhe janë rritur investimet të huaj direkte për 47 për qind. Gjithashtu kemi pasur në prill pakon e ringjalljes ekonomike prej 100, të cilës ia kemi bashkëngjitur në shtator pakon e përballje me inflacion 150 milionë euro dhe unë besoj që kjo e dyta ka ndikuar edhe në kursim të energjisë elektrike prej 15 % për amvisëri për muajin nëntor të këtij viti, krahasuar me nëntorin e vitit të kaluar”.
“Rezervat shtetërore për 15 herë dhe 5 mijë gra janë punësuar me masën 1.3, me ç’rast janë punësuar gjithsej persona me aftësi të kufizuar 239, 119 burra dhe 120 gra, sepse ky vit ishte shpallur vit i personave me aftësi të kufizuara. Ajo çfarë duhet të përmendet është që tashmë do të kemi një projektligj të ri dhe ka kaluar në Kuvendin e Kosovës dhe është bërë ligj, është Ligjin për Pagat dhe ndonëse kemi pritur më gjatë, po e rregullojmë barazinë e brendshme, ku paga më e lartë e presidentes do të jetë vetëm 1.5 herë më e lartë sesa e mjekut specialist, do të jetë vetëm 3.12 herë sesa e ushtarit të thjeshtë dhe do të ketë një nivel të përafërt midis pagës së profesorit të rregullt, prokurorit apo gjyqtarit dhe mjekut specialist në anën tjetër”, tha Kurti në intervistën e dhënë për fundivit.