Ofenduese e inskenim të rastit i kanë quajtur akuzat e Prokurorisë Speciale, për krime lufte ish-shefi i Shtabit të Përgjithshëm të UÇK-së, Sylejman Selimi e ish-luftëtari Jahir Dermaku.
Të dy këta në fjalët përfundimtare para trupit gjykues, përmenden se kanë mbajtur burg vite më parë, por që arsyen nuk e kanë pasur të qartë.
Selimi tha se është tragjedi dhe komike, që duke u bazuar vetëm në deklaratë të një dëshmitari, që sipas tij ka shpifur, prokuroria të i ngarkoi me akuza të tilla.
“Është turp me ardh në këtë gjykatore me thanë që une e kam rrahur një person në kohën më të vështirë për cfarë arsye, se nuk i kanë shitur dele UÇK-së..Ne e kemi mbajtur burgim e si dim pse, prapë jam këtu nuk e di për cka është poshtëruese e zhgënjyese…është total gabim ky proces jemi mundu edhe me faza të mëhershme e kuptoj edhe rrethanat që i kanë pas ata por ju e dini edhe kohën e luftës ju edhe e keni përjetu vet. Kam luftu ndershëm dhe kjo është krenaria më e madhe e jetës sime,” ka thënë i akuzuari, Sylejman Selimi.
“Por, për ta inskenuar rastin si krime lufte, për t’i dhënë publicitet e për ta bërë të duket si rast i rëndësishëm në nivelin e lartë, mundësia më e mirë për ta ka qenë të na përfshijnë ne, pasi ishim në pozita të rëndësishme publike në atë kohë, e gjatë luftës ishim pjesëtar të UÇK-së, duke shërbyer me nder luftës për liri të vendit tonë,” ka thënë i akuzuari Jahir Dermaku
Vendim lirues, e duke folur për këtë proces të nisur vite më parë, kërkuan avokatët, të cilët e konsideruan si jokredibil dëshmitarin e vetëm.
“Deklarata e dëshmitarit A nuk e plotëson asnjërën kriter të këtij testi, sepse deklarata e tij nuk e kalon asnjërën pikë, as nuk e ka ndërlidhjen me realitetin, të paktën në aktin e akuzës,” tha avokati i Sylejman Selimit, Artan Qerkini.
“Ky proces gjyqësor është duke u zvarrit prej vitit 2011, një barrë e madhe u kanë për këta njerëz që kanë qenë dhe janë bartës të luftës, fakt të cilin nuk e kanë mohuar asnjëherë edhe ne si avokat kemi theksuar se kanë qenë pjestarë të luftës dhe kanë kontribuar në atë luftë,” tha avokati i Jahir Demakut, Mexhid Syla.
Por, Prokuroria Speciale konsideron se të akuzuarit duhet të dënohen.
“Dëshmitari A në mënyrë të qartë e përshkruajti ngjarjen se si gjatë kohës së konfliktit të brendshëm në Kosovë, gjatë kohës së luftës e kishin marr dy persona, siç i quan ai me veshje të kamoflluar të UCK-së, dhe e kishin quar në një vend të ashtuquajtur burg i Likocit, dhe posa ka arritur atje përvec që i njëjti është dënuar e malltretuar e kemi edhe aktgjykime të formës së prerë, e kishte parë edhe një viktimë tjetër nga fshari Shipol i Mitrovicës, ai ishte viktimë civile, viktimë shqiptare dhe arsyeja e ndaljes nga këta ishte për shkak se sipas tyre nuk ishte përkrahës i UÇK-së,” deklarata e prokurores Florije Shamolli.
Sylejman Selimi u dënua nga Gjykata në Mitrovicë më 2015, për rastin Drenica 2 me 8 vite burgim, por Apeli e kishte ulur në 7 vite. Derisa për rastin “Drenica 1” ishte dënuar me 6 vjet dhe rasti është kthyer në rigjykim por që nuk ishte trajtuar asnjëherë, deri në këtë vit.