Pas të shtënave me armë zjarri në qendrën tregtare Fields në Kopenhagë, ku mbetën të vrarë një numër i paspecifikuar njerëzish, policia ka njoftuar se koncerti i paraparë të mbahej me Harry Styles në Royal Arena, është anuluar.
Sipas policisë, thuhet se aktualisht janë mbyllur linjat e metrosë M1 dhe M2.
Ndryshe, sulmuesi i dyshuar, i cili është në paraburgim, është një 22-vjeçar. Ai është arrestuar pranë qendrës tregtare Fields. Kështu ka deklaruar inspektori i policisë, Soren Thomassen.
Megjithatë, ai nuk ka dhënë asnjë detaj të mëtejshëm për viktimat apo të dyshuarit.
Ndërkohë, spitali kryesor i kryeqytetit danez, Rigshospitalet, ka pranuar një “grup të vogël pacientësh”, për trajtim.
Kështu është shprehur një zëdhënës për Reuters, teksa ka shtuar se spitali ka thirrur staf shtesë, duke përfshirë kirurgë dhe infermierë.
Qendra tregtare është në periferi të Kopenhagës, përballë një linje metroje që lidh qendrën e qytetit me aeroportin ndërkombëtar.
Disa të vdekur nga të shtëna me armë zjarri në një qendër tregtare në Kopenhagë