Duke komentuar votën e Serbisë në favor të përjashtimit të Rusisë nga Këshilli i të Drejtave të Njeriut të OKB-së, presidenti serb Aleksandar Vuçiq, ka thënë se qëndrimi fillestar i Serbisë ishte që të abstenoj, mirëpo pas siç ka thënë ai “rritjes së presionit”, janë detyruar të votojnë pro përjashtimit të Rusisë.
Ai në vend se të përgjigjet, ka shtruar pyetje duke thënë se njerëzit thonë: “Pse nuk kundërshtoni gjithçka?”
Abstenimi i Serbisë sipas Vuçiqit do të thotë se “të dyja palët do të jenë kundër nesh”, kishte thënë ai për RTS-in në një intervistë të enjten vonë.
Presidenti serb gjithashtu ka thënë se presioni dhe shantazhet nuk e kishin në shënjestër atë personalisht, por Serbinë.
“Ata thanë ‘a e dini se po merret një vendim për Serbinë?’ dhe nëse do të përjashtohemi nga paketa e sanksioneve të naftës dhe nëse do të mund të importojmë naftë pas 15 majit”, ka thënë ai ndër të tjera në intervistë.