Partia Demokratike e Kosovës e ka akuzuar Lëvizjen Vetëvendosje se e ka vendosur militantin e saj në krye të mediumit publik RTK.
Emërimi i Rilind Gërvallës si drejtor, sipas PDK-së e shndërron RTK-në “në megafon të Albin Kurtit”.
Përvec Kurtit, partia më e madhe opozitare në vend e ka akuzuar edhe presidenten e Kosovës, Vjosa Osmani për punësim të militantëve në RTK.
“Në vazhdën e kapjes së secilit institucion të pavarur në Kosovë, kryeministri Albin Kurti në koordinim të ngushtë me partneren e tij, presidenten Vjosa Osmani, tash e disa muaj kanë nisur instalimin e militantëve të tyre në Radio Televizionin Publik të Kosovës”, thuhet në reagimin e tyre.
“Kapja e RTK-së nga kryeministri Albin Kurti me mbështetjen e presidentes Vjosa Osmani ka filluar që nga zgjedhja e anëtarëve të Bordit të RTK-së, të cilët tani po i përdorin për realizimin e planit politik të partisë në pushtet për instalimin e militantëve në pozita drejtuese, duke kulmuar sot me emërimin e militantit Rilind Gërvalla si drejtor i Televizionit Publik”, vazhdon njoftimi.
Sipas PDK-së me emërime politike “militantët që do ta drejtojnë RTK-në, do të marrin urdhra nga ideologët dhe propaganduesit e tyre partiak”.
Në reagimin e tyre po ashtu thuhet se i emëruari si drejtor Rilind Gërvalla është militant i LVV-së që 15 vjet.
Ndërkaq, pas akuzave të shumta në drejtim të tij Gërvalla ka paralajmëruar se do të përdorë rrugë ligjore ndaj atyre sic i ka quajtur ai propaganda ndaj tij.
Më herët kundër këtij emërimi ka reaguar edhe Lidhja Demokratike e Kosovës dhe Partia Socialdemokrate.