Dega e Partisë Demokratike të Kosovës në Lipjan, pas arrestimit të nëntë zyrtarëve të Komunës së Lipjanit, që po hetohen për dëmtim të buxhetit komunal përmes pranimit të punimeve në stadiumin e Magures, ka kërkuar dorëheqjen e kryetarit të Lipjanit, Imri Ahmeti.
Në njoftimin e PDK-së thuhet se “në një nga tenderët e fituar nga një kompani, menaxher i kontratës është një prej të arrestuarve të djeshëm, për të cilin Imri Ahmeti, në kohën e qeverisjes qendrore të LDK-së me Lëvizjen Vetëvendosje, ka ndikuar në emërimin e tij kryesues i bordit të KUR Prishtina, i cili më pas e ka avancuar djalin e Imri Ahmetit në pozitë brenda kësaj kompanie”.
“Po ashtu, disa prej zyrtarëve të arrestuar, kanë krijuar një zinxhir të korrupsionit në dhënien e lejeve ndërtimore. Ata bëjnë projektimet e objekteve ndërtimore, mbikëqyrjen, pranimin dhe legalizimin e tyre. Dhe nëse këta zyrtarë nuk e bëjnë projektimin, askush nuk mund të marrë leje ndërtimore në Komunën e Lipjanit”, vijon njoftimi.
Në njoftimin e PDK-së thuhet se dorëheqja e kryetarit të Komunës së Lipjanit, Imri Ahmeti “duhet të jetë para së gjithash obligim moral para të gjithë qytetarëve të Lipjanit, të cilët meritojnë të jenë të barabartë në marrjen e shërbimeve komunale dhe përfitimin nga investimet lokale”.
“Ne nuk do të ndalemi së denoncuari çdo shkelje të bërë nga ekzekutivi i Komunës së Lipjanit, sa herë që kemi fakte dhe dëshmi. Dhe do t’ua rikujtojmë ato në vazhdimësi qytetarëve dhe organeve të rendit, derisa drejtësia të vihet në vend”.