Agjencia kundër Korrupsionit ka bërë të ditur se rreth 550 zyrtarë nuk i janë përgjigjur kërkesës për deklarim të pasurisë, edhe pse afati ligjor, sipas kësaj agjencie, përfundon të enjten.
Përmes një komunikate për media, AKK-ja u ka bërë thirrje atyre që ende nuk e kanë kryer obligimin ligjor, ta shfrytëzojnë kohën e mbetur.
Afati ligjor për deklarim të rregullt vjetor të pasurisë për vitin 2021 ka qenë një muaj, nga një marsi deri më tridhjetë e një mars të vitit 2022.
“Agjencia kundër Korrupsionit rikujton zyrtarët e lartë publikë që mosdeklarimi paraqet vepër penale dhe e detyron AKK-në të veprojë në pajtim me nenin 430 të Kodit Penal të Kosovës”, thuhet në komunikatën e tyre.
Formulari i deklarimit, sipas AKK-së, mund të dorëzohet fizikisht në zyrat e tyre gjatë orarit të rregullt të punës ose të skanohet dhe të nënshkruhet nëpërmjet adresës elektronike të tyre.
Ligji për deklarimin e pasurisë nga zyrtarët publikë, sipas nenit gjashtë paragrafi një, bëhet gjatë kohës së ushtrimit të funksionit publik nga data një mars deri më tridhjetë e një mars të çdo viti kalendarik.
Pas deklarimit të pasurisë, zyrtari i lartë publik, brenda afatit të paraparë, duhet të deklarojë çdo ndryshim në gjendjen e pasurisë.