Në Kompleksin Nacional të FFK-së në Hajvali, ka përfunduar faza e parë e kursit të trajnerëve për Licencën B – UEFA. Në këtë vit për t’u pajisur me Licencën – B, kishte një numër të madh të trajnerëve të interesuar.
Albert Bunjaku, drejtori teknik në FFK, ka thënë se tani janë në fazën e modernizimit të edukimit për licencim, sipas standardeve të UEFA-s që nuk dallojnë prej atyre në Angli, Francë, apo vendeve tjera, transmeton “Telegrafi”.
Bunjaku ka treguar se UEFA, si dhe disa prej federatave anëtare, kanë filluar të punojnë në atë drejtim që të krijohen edhe licenca për grupmoshat e reja.
“I motivoj dhe i ftoj trajnerët që në të ardhmen të mos fokusohen vetëm te Licenca – B për trajner kryesor të ekipit A. Mundesh me e pas një ëndërr gjithmonë që të jesh me grupmosha të reja, pse jo, nuk ka kënaqësi më të madhe se sa të punosh me këto grupmosha”, është shprehur Bunjaki.
Elon Berisha, instruktor i licencuar nga UEFA, ka thënë që kur ka filluar ky kurs e deri më tani, çdo gjë ka shkuar suksesshëm sipas planit.
“Tani është duke u zhvilluar faza e parë e kursit, e cila është si provë e teorive të cilat kandidatët tashmë i posedojnë. Pas kësaj faze, trajnerët do të marrin detyrat, të cilët duhet t’i realizojnë gjatë një muaji, ku më pas do të kthehen prapë në kampin ku po i zhvillojmë stërvitjet dhe do të fillojë faza e dytë. I gjithë procesi për pajisjen e trajnerëve me Licencën – B pritet të përfundojë në fund të muajit qershor”, ka deklaruar instruktori Elon Berisha.
