I ashtuquajturi drejtor i Zyrës për Kosovën në Qeverinë e Serbisë, Petar Petkoviq, pas takimit me ambasadorin e Spanjës në Serbi, Juan Jose Sanz Aparicio, ka paralajmëruar “përkeqësimin e situatës dhe rrezikimin e stabilitetit në Kosovë”.
Ky paralajmërim vjen pas aksionit policor ndaj institucioneve financiare serbe në veri të Kosovës, që rezultoi me mbylljen e gjashtë objekteve të Bankës Kursimore të Postës dhe Bankës Popullore të Serbisë në katër komunat në veri të Kosovës.
“Është plotësisht e qartë se ‘regjimi’ i Albin Kurtit jo vetëm që dëshiron ta lërë popullin serb në Kosovë pa rroga, pensione dhe përfitime sociale, por edhe të ndërpresë fondet për spitalet, shkollat, kopshtet dhe institucionet e tjera”, ka thënë Petkoviq.
Gjatë aksionit u konfiskuan prova të ndryshme, përfshirë para.
Policia e Kosovës, që bashkëngjiti fotografi të parave të konfiskuara, tha se u gjeti “rreth 1.600.000 euro, rreth 74.700.000 dinarë serbë (mbi 600.000 euro), rreth 19.500 franga, rreth 13.800 dollarë amerikanë, rreth 40 dollarë australianë”.
Aksioni i i policisë së Kosovës vjen një javë pasi Banka Qendrore e Kosovës njoftoi se ka përfunduar afati tranzitor për rregulloren e saj, që ndalon përdorimin e dinarit serb për kryerjen e pagesave.