Presidenti ukrainas Volodymyr Zelensky është takuar në Paris me presidentin francez Emmanuel Macron, në përpjekje për të siguruar mbështetje të fuqishme evropiane në një moment kur Uashingtoni po i kërkon Kievit të pranojë një plan paqeje për t’i dhënë fund konfliktit me Rusinë.
Gjatë takimit në Paris, të dy liderët diskutuan mbi ecurinë e negociatave dhe mundësitë për arritjen e një paqeje të qëndrueshme. Sipas Pallatit Elysee, Macron dhe Zelensky zhvilluan gjithashtu bisedime me Witkoff dhe me kreun e ekipit negociator ukrainas, Rustam Umerov.
“Lufta duhet të përfundojë sa më shpejt që të jetë e mundur. Tani shumë varet nga angazhimi i secilit udhëheqës. Sot do të kemi bisedime edhe me liderë të tjerë”, shkroi Zelensky në platformën X.
Ndërkohë, konsultimet e fundit në Florida kishin si qëllim përpunimin e detajeve të planit amerikan të paqes. Palët pjesëmarrëse e konsideruan takimin si produktiv, edhe pse pranuan se një sërë çështjesh të vështira mbeten ende të hapura.
Rustam Umerov, që udhëhoqi delegacionin ukrainas në Florida, i përshkroi bisedimet si të rëndësishme dhe sfiduese, por gjithsesi produktive. Sekretari amerikan i Shtetit, Marco Rubio, i cili udhëheq ekipin amerikan së bashku me Witkoff, theksoi se kërkohen përpjekje të mëtejshme dhe se çdo marrëveshje përfundimtare duhet të ketë miratimin e Rusisë.
Megjithë presionet ndërkombëtare për uljen e tensioneve, presidenti rus Vladimir Putin nuk ka shfaqur gatishmëri për kompromis, ndërkohë që forcat ruse vijojnë ofensivën në terren dhe bombardimet ndaj qyteteve ukrainase.