Janë identifikuar dy persona “me interes për intervistim” lidhur me shpërthimin e një granate dore, mbrëmë në veriun e vendit.
Lajmin për Portalin Dukagjini e ka konfirmuar zëvendësdrejtori i Policisë për rajonin e veriut, Veton Elshani.
“Njësiti i Hetimeve Rajonale Mitrovica Veri ka vazhduar punën sot me intensitet të shtuar dhe tashmë i ka identifikuar 2 persona të cilët janë persona me interes për intervistim. Të njëjtit i kemi kërkuar edhe në shtëpitë e tyre, por nuk janë aty”, ka thënë Elshani.
Elshani ka thënë se besohet që ky konflikt ka qenë pasojë e problemeve të mëhershme në mes të këtyre personave.
Ndryshe, dy persona kanë mbetur të plagosur të hënën mbrëma në veri të Mitrovicës, si pasojë e këtij shpërthimi.
Njëri nga të plagosurit, sipas policisë, ka marrë lëndime të rënda, por që i njëjti ndodhet jashtë rrezikut për jetë.
Valon Preteni nga Prokuroria Themelore e Mitrovicës, për Portalin Dukagjini, më herët ka bërë të ditur se rasti është duke u hetuar si “Vrasje e rëndë në tentativë“, “Shkaktimi i rrezikut të përgjithshëm“ dhe “Mbajtja në pronësi, kontroll ose posedim të paautorizuar të armëve”.
“Me datë 15 janar 2024 rreth orës 23:52, rrugën ‘Knjaz Millosh’ në Mitrovicë të Veriut, një person deri tash i paidentifikuar ka hedhur një mjet shpërthyes që dyshohet të jetë granatë dore, në drejtim të dy viktimave të cilët kanë pësuar plagë trupore. Prokurori kujdestar i Krimeve të Rënda i Prokurorisë Themelore në Mitrovicë ka dalë në vendin e ngjarjes dhe së bashku me policinë rasti është duke u hetuar për veprat penale ‘Vrasje e rëndë në tentativë’, ‘Shkaktimi i rrezikut të përgjithshëm’ dhe ‘Mbajtja në pronësi, kontroll ose posedim të paautorizuar të armëve’”, ka deklaruar Preteni.