Në njoftimin zyrtar të Policisë së Elbasanit në Shqipëri thuhet se nga shërbimet e Uzinës Ushtarake Çekin në Gramsh, në afërsi të rrethimit të uzinës është parë një person i paidentifikuar me aparat fotografik në dorë, i cili ka tentuar t’i fotografojë ambientet e zonës ushtarake.
Në momentin që dy ushtarët që ruanin objektin, e kanë pikasur dhe i janë afruar ta ndalojnë dhe ta kapin, ai iu është kundërpërgjigjur me sprej neuroparalizues. Por, dy ushtarët që ruanin uzinën kanë bërë të mundur ndalimin e tij.
“Shërbimet e Policisë me të marrë njoftim kanë shkuar menjëherë në vendngjarje dhe kanë bërë shoqërimin e shtetasit rus, M. Z., 24 vjeç, në ambientet e Komisiaratit të Policisë Gramsh, për veprime të mëtejshme”, thuhet në njoftimin e tyre.
Gjithashtu, shërbimet e Policisë nga veprimet paraprake hetimore kanë marrë informacion se ky shtetas ishte shoqëruar edhe nga dy shtetas të tjerë, dhe menjëherë kanë ngritur pika kontrolli dhe kanë kontrolluar zonën.
Shërbimet e Policisë bënë të mundur që në afërsi të kësaj zone të konstatojnë dhe të bllokojnë automjetin e tipit “Chevrolet”, me të cilin udhëtonin shtetasja ruse S.T. 33 vjeçe dhe shtetasi ukrainas F. A., 25 vjec, të cilët janë shoqëruar për veprime të mëtejshme.
Grupi hetimor, nën drejtimin e Prokurorisë së Rrethit Gjyqësor Elbasan, ndodhet në vendngjarje dhe vijon punën për zbardhjen e rrethanave të ngjarjes dhe dokumentimin ligjor të saj.
Për këtë ngjarja janë angazhuar Departamenti i Policisë Kriminale dhe Drejtoria e Antiterrorit në Policinë e Shtetit dhe po koordinojnë veprimet me Shtabin e Përgjithshëm të Forcave të Armatosura.
Dy ushtarakët e lënduar pas ndihmës së parë mjekësore janë transportuar në Tiranë për ndihmë mjekësore më të specializuar dhe ndodhen nën kujdesin e mjekëve jashtë rrezikut për jetën.