Prokuroria Themelore e Prishtinës ka autorizuar Policinë e Kosovës, t’i ndërmarrë veprimet e nevojshme për ta sqaruar rastin e pacientit në QKUK, i cili vdiq rreth tri orë pas operimit në zemër.
Zëdhënësja e Prokurorisë, Laureta Ulaj, për Portalin Dukagjini, ka thënë se në rast të paraqitjes së veprave apo elementeve të ndonjë vepre penale, do të merren veprime të tjera.
“Prokurori i Shtetit ka autorizuar Policinë t’i ndërmarrin veprimet e nevojshme, me qëllim të sqarimit të kësaj çështjeje dhe eventualisht në rast të paraqitjes së elementeve të ndonjë vepre penale, do të veprohet tutje me këtë rast”, ka thënë Ulaj.
Pacienti kishte vdekur në QKUK tri orë pas intervenimit kirurgjik në zemër. Atë e kishte operuar kardiologu Kushtrim Shala, i cili, pas operacionit, e kishte vlerësuar si të suksesshëm atë.
Shala ishte akuzuar se ka pasur mungesë përvoje nga drejtori i klinikës, Rifat Brahimaj.
Atij i është kundërpërgjigjur Shala duke thënë se ndaj tij është bërë tentim për eliminim profesional nga Brahimaj, të cilin e ka akuzuar vetë për mungesë përvoje.