Deputjetja nga radhët e Aleancës për Ardhmërinë e Kosovës, Time Kadrijaj, i ka drejtuar një pyetje kryeministrit të Kosovës, Albin Kurti, duke thënë se ai ka marrë një rol të ri në sektorin e shëndetësisë, atë të ministrit.
Kjo pyetje për Kurtin vjen nga Kadrijaj si rrjedhojë e caktimit të Kurtit në krye të Komisionit për Shëndetësi dhe njëherit, nga një raportim për një dorëheqje të mundshme nga ana e ministrit Latifi.
Gjersa ka theksuar se është shqetësuse çështja e listave të pritjes dhe stërzgjatja e tyre, Kadrijaj ka thënë se një rol të madh luan numri i vogël anesteziologëve.
“Kryeministër, po shkove te kirurgjia vaskulare pritja është 1-2 vjet, për rezonancë magnetike 1-2 vjet, ndërsa në kardiologji lista e pritjes është enorme. Këdo që do ta vendosësh, vendose një profesionist që e njeh gjendjen në Kosovë se këtu po pësojnë qytetarët e Kosovës”, ka thënë Kadrijaj.
Ndërkaq Kurti paraprakisht kishte thënë se Ligji për Pagat ka përfunduar konsultimet publike të tij se dhe hollësitë procedurale janë duke u trajtuar para se ai të dërgohet në Qeveri dhe Kuvend.
Sektori i shëndetësisë zuri vend në fjalën e tij.
“Profesionistët shëndetësorë e kanë atë që e meritojnë maksimalisht në rrethanat dhe mundësitë ekzistuese. Përpos pagës dhe shtesave standarde në ligjin për zyrtar publik, ata që punojnë në sektorin publik do të kenë shtesë të veçantë”, ka deklaruar Kurti.
Sa u përket profesionistëve të huaj, Kurti ka thënë se u bën thirrje për inkuadrim në sektorin e shëndetësisë, ashtu që të rritet cilësia në vend dhe kontributi i tyre të bëhet një kontribut institucional.
Në media është duke u raportuar se Rifat Latifi ka dhënë dorëheqje nga pozita e ministrit të Shëndetësisë. Arsyet e kësaj dorëheqjeje nuk dihen, pasi ende Qeveria e Kosovës apo vetë Latifi nuk kanë folur zyrtarisht për këtë çështje.