Paneli për Ankesa dhe Parashtresa (PZAP) ka shfuqizuar vendimin e Komisionit Qendror të Zgjedhjeve (KQZ) dhe ka urdhëruar certifikimin e listës së kandidatëve për deputetë të Listës Serbe.
Kjo pas ankesës së paraqitur nga ky subjekt politik, pasi KQZ kishte refuzuar më herët certifikimin e listës së tyre për zgjedhjet parlamentare.
Në vendimin e PZAP-it thuhet se ankesa e Listës Serbe aprovohet dhe se ndryshohet vendimi i KQZ-së i datës 10 dhjetor 2025. Paneli vendosi që të pranohet rekomandimi i Zyrës për Certifikim dhe Kontroll Financiar në KQZ, i datës 11 dhjetor 2025, duke e urdhëruar kështu certifikimin e listës me 33 kandidatë të këtij subjekti politik.
“Certifikohet lista e kandidatëve të Listës Serbe, me seli në Mitrovicën e Veriut, për pjesëmarrje në Zgjedhjet e Parakohshme për Kuvendin e Republikës së Kosovës, që do të mbahen më 28 dhjetor 2025”, thuhet në vendim.
