Ish-drejtori i Policisë së Kosovës, Rashit Qalaj, ka kërkuar shkarkimin e drejtorit aktual të policisë, Samedin Mehmetit.
Kështu ka thënë Qalaj, teksa e ka cilësuar alarmim arrestimin e 80 zyrtarëve policorë në vetëm dy muaj. Kjo, sipas tij, tregon që gjendja në këtë institucion nuk ka qenë kurrë më keq se në këtë periudhë.
“Drejtori i policisë është dashur të shkarkohet shumë moti. Në momentin kur ka filluar të realizojë të gjitha kërkesat e ministrit të Punëve të Brendshme Xhelal Sveçla, në momentin kur ministri është bërë edhe drejtor i Policisë edhe zëvendës i Policisë edhe gjithçka në polici, atëherë pozita e drejtorit është dashur të lëshohet sa më shpejt”, është shprehur ai për EO.
Qalaj – njëherit deputet i Partisë Demokratike të Kosovës (PDK), ka theksuar se qeveria aktuale e udhëhequr nga kryeministri Albin Kurti, “nuk është në gjendje të udhëheqë vendin”.
“Mund të them që më së paku është duke u luftuar krimi dhe korrupsioni”, ka shtuar ai.
Në anën tjetër, për kryetarin e Komisionit për Siguri, Bekë Berisha, problemi më i madh qëndron në etiketimin e policëve të korruptuar që më pas po lirohen.
“Imazhi i policisë nuk prishet për shkak se arrestohet edhe ndonjë polic që është i korruptuar. Kam pasur vërejtjet e mia se nuk është dashur të arrestohen 100 policë e në fund të mbahen dhjetë prej tyre e të tjerët të etiketohen e të lirohen”, ka thënë ai.
Ai e ka akuzuar qeverinë për prishje të imazhit të policisë, derisa ka shtuar se, kur një operacion realizohet suksesshëm, meritat i merr qeveria, kurse në rast të dështimit “askush nuk merr përgjegjësi”.
Ndryshe, më 15 prill të vitit 2022, përmes një konference të jashtëzakonshme, ministri i Punëve të Brendshme Xhelal Sveçla bashkë më drejtorin e policisë, Samedin Mehmeti, kishin bërë të ditur se në mëngjesin e së premtes dy vetura të Policisë së Kosovës, të cilat po bartnin zyrtarë policorë për në pikat kufitare në veri, ishin sulmuar, me armë automatike dhe granatë dore.
Ky sulm, sipas Sveçlës, ishte sulm terrorist i orkestruar që kishte për shënjestër lëndimin e policëve.
Ministri Sveçla kishte potencuar se brenda katër ditësh kanë ndodhur katër sulme që lidhen me njëri-tjetrin, teksa shtonte se këto sulme vijnë si pasojë e luftës ndaj krimit, korrupsionit dhe kontrabandës që po e luftojnë bashkë me Policinë e Kosovës.
Policia sulmohet me armë dhe granata, Sveçla e quan akt terrorist