Kryetari i Listës Serbe, Goran Rakiq, të hënën e ka pritur në takim komandantin e KFOR-it, Ferenc Kajari.
Përmes një postimi në Facebook, i pari i Listës Serbe i ka cilësuar si provokime patrullimet e fundit të njësive policore të Kosovës në liqenin e Ujmanit.
Rakiq ka thënë se nuk do të lejojnë asnjë provokim nga njësitë speciale të Kosovës.
“Nuk do të lejojmë asnjë provokim as nga njësitë speciale të Kosovës dhe as nga forcat e sigurisë së Kosovës, sepse çdo veprim i tyre i njëanshëm rrezikon paqen dhe stabilitetin”, ka shkruar Rakiq.
Ministri i Punëve të Brendshme, Xhelal Sveçla, ka njoftuar se të enjten e tetë shtatorit Policia e Kosovës ka filluar me patrullimin e rregullt të vijës kufitare mes Kosovës dhe Serbisë si dhe gjithë hapësirës së Liqenit të Ujmanit.
Sipas tij, ky është patrullimi i parë që nga paslufta që bëhet në atë zonë.
Sveçla ka bërë të ditur se para disa javësh, teksa Policia e Kosovës po e bënte një testim në liqenin e Ujmanit, janë sulmuar me armë nga disa persona që gjendeshin matanë lumit.
Për këtë arsye, sipas Sveçles, janë bërë përforcime për t’i evituar rastet e ngjashme.