Inspektorati Policor i Kosovës (IPK) ka nisur një hetim paraprak për të verifikuar nëse ka pasur ndonjë lëshim apo përfshirje të zyrtarëve policorë në veprimtarinë kriminale të Mefail Shkodrës, i shpallur në kërkim për vrasjen e trefishtë në Gjilan.
Sveçla urdhëron IPK-në për hetimin e mundshëm të përfshirjes së policëve në rastin e Mefail Shkodrës
Në kuadër të këtij hetimi, IPK ka rekomanduar suspendimin e katër zyrtarëve policorë nga Drejtoria Rajonale e Policisë në Gjilan, për të ruajtur integritetin e hetimit dhe për të shmangur çdo ndikim mbi dëshmitarë apo prova.
Sipas rekomandimit, janë suspenduar një rreshter policor dhe një hetues nga njësiti i hetimeve rajonale në Gjilan, një rreshter policor dhe shef i hetimeve në Stacionin Policor të Novobërdës, si dhe një zyrtar policor i Njësisë së Reagimit të Shpejtë në Gjilan.
“Inspektorati Policor i Kosovës ka filluar një hetim paraprak në kuadër të të cilit do të hetohet nëse ka pasur ndonjë lëshim apo përfshirjeje të mundshme të ndonjë pjesëtari të Policisë së Kosovës në veprimtarinë kriminale të të dyshuarit i shpallur në kërkim për vrasjen e trefishtë në Gjilan.
Bazuar në autorizimet ligjore dhe në rëndësinë e ruajtjes së integritetit të hetimit dhe shmangien e çdo ndikimi mbi dëshmitarë apo prova, Inspektorati Policor i Kosovës i ka rekomanduar sot Policisë së Kosovës suspendimin për katër zyrtarë policorë të Drejtorisë Rajonale të Policisë në Gjilan.
Bazuar në rekomandimin e IPK-së janë suspenduar një rreshter policor dhe një hetues nga njësiti i hetimeve rajonale të Drejtorisë rajonale në Gjilan, një rreshter policor – shef i hetimeve në Stacionin Policor të Novobërdës dhe një zyrtar policor i angazhuar në Njësinë e Reagimit të Shpejtë, Drejtoria Rajonale e Policisë Gjilan.
Inspektorati Policor i Kosovës, në koordinim me Kryeprokurorin e Prokurorisë Themelore Gjilan është duke zhvilluar hetime penale paraprake ndaj të lartcekurve lidhur me dyshime për përfshirje në veprimtari të kundërligjshme me elemente të veprës penale.
Hetimet janë në fazën fillestare dhe përfshijnë mbledhjen e provave materiale, marrjen e deklaratave dhe veprime të tjera procedurale”, thuhet në njoftim.