Përveç golave e futbollit të bukur, Vinicius Junior këtë edicion ka qenë temë në futboll edhe për një gjë jo shumë të hijshme.
Fatkeqësisht, shpesh herë gjatë ndeshjeve si mysafir të Real Madrid-it, braziliani ka qenë cak i sulmeve raciste.
Sipas mediave të afërta me klubin, kjo gjë nuk është ndalur por në të kundërtën është shtuar, duke u bërë çdo herë e më e dukshme.
Vizitat te Atletico Madrid para disa muajve dhe kjo e fundit e madrilenëve te Mallorca, kanë qenë ndër më të rëndat, duke detyruar edhe klubin por edhe vet ligën që të reagojë kundër këtyre veprimeve të ulëta.
Lajmi i fundit që vjen nga dita e sotme, është se Real Madrid tashmë janë të frikësuar që mund të humbasin fantazistin e tyre.
Braziliani si duket ka humbur durimin ndaj këtyre dhe sulmeve, dhe përsëritjet e shpeshta mund ta shtyjnë atë jashtë Madrid-it.
Se cili do të jetë reagimi i krerëve të La Liga, mbetet për t’u parë – por drejtuesit e klubit mbretëror kanë bërë të ditur që në rast të përsëritjeve, ata do të marrin masa më të mëdha vet, duke bojkotuar edhe ndeshjet nëse është nevoja.