Ministri i Brendshëm i Kosovës, Xhelal Sveçla, ka reaguar pas përplasjes së helikopterit në qytetin e Brovary të Kievit, duke shprehur ngushëllime për vdekjen e ministrit të Brendshëm ukrainas dhe të gjithë të tjerëve që mbetën të vdekur.
“Jemi tronditur nga tragjedia e ndodhur afër Kievit, me ç’rast ka humbur jetën ministri i Brendshëm i Ukrainësm Denys Monastyrsky, zëvendësi i tij i parë, Yevheniy Yenin, zyrtarë të Ministrisë e fëmijë që ndodheshin në institucionin ku ndodhi tragjedia”, është shprehur ai.
Sveçla në një postim në rrjetin social Fecebook, ka shkruar se zëvendësin e ministrit të Brendshëm ukrainas, i cili ka mbetur i vdekur në rrëzimin e helikopterit, e kishte takuar në darkën e ministerialit që është mbajtur para disa muajsh në Pragë.
“Përgjatë bisedës me të, kam kuptuar se Ukraina e sulmuar padrejtësisht e pa arsye nga Rusia, ka triumfuar deri më tash falë profesionalizmit, përkushtimit dhe atdhedashurisë për vendin si të z. Yenin dhe bashkëpunëtorëve të tij”, ka shkruar ministri Sveçla.
Po ashtu, ai ka thënë se “ndajmë dhimbjen në këtë humbje të madhe me familjarët e të vdekurve dhe gjithë popullin ukrainas, ndërsa të lënduarve ju urojmë shërim sa më të shpejtë”.
Ndërkaq, ai ka theksuar se këso tragjedi dhe humbje të tilla rëndojnë mbi Ukrainën, por sipas tij, ajo do të dalë fitimtare përballë Rusisë agresore.
Ndërsa, edhe kreu i Qeverisë së Kosovës, Albin Kurti, ka shprehur ngushëllime për vdekjen e ministrit të Punëve të Brendshme të Ukrainës, Denys Monastyrsky, i cili ishte në mesin e 15 personave të vdekur nga rrëzimi i helikopterit në periferi të Kievit.