Kryeministri i Kosovës, Albin Kurti, në lidhje me paralajmërimet nga ZRrE-ja për shtrenjtim të energjisë elektrike ka thënë se si Qeveri e Kosovës nuk do të ndërhyjë në punën e tyre, pasi është institucion i pavarur.
Por, Kurti ka potencuar se si kryeministër i qytetarëve do të mundohet që t’ua lehtësojë atyre barrën e çmimeve.
“Ministrat e linjës kanë komunikuar dhe janë dakorduar dhe i kanë dhënë rekomandimet e tyre ZRrE-së në bashkëpunim me KEK-un sa i përket sektorit të energjisë e në veçanti sa i përket çmimeve të energjisë elektrike. Çka zotohem unë si kryeministër është se në njërën anë nuk u ndërhyjmë punës së institucioneve të pavarura, por në anën tjetër do të bëjmë gjithçka që t’u lehtësojmë barrën qytetarëve me çmimet dhe sigurimin e energjisë sa më stabile” ka thënë Kurti.
Ndryshe, gjatë procesit të shqyrtimit të tarifave, ZRrE-ja ka propozuar që çmimi i rrymës të rritet për 14 për qind. Ky propozim ka ardhur pas kërkesës së KESCO-s që çmimi të rritet për 50 për qind.
Edhe KEK-u ka kërkuar që të rritet çmimi i megavatit të energjisë që ai ia shet KEDS-it dhe KOSTT-it nga 29.5 në 32.5 euro.
Vendimi për tarifat e reja pritet të merret gjatë këtij muaji, ndërsa ato do të hyjnë në fuqi nga 1 prilli.