Policia e Kosovës ka konfirmuar për Portalin D, se gjatë ditës së hënë të gjashtë qershorit, rreth orës 15:30 ka pranuar një thirrje në stacionin policor të Rahovecit, ku ishin njoftuar se në fshatin Zatriq të Komunës së Rahovecit, dy persona ishin goditur nga rrufeja.
Vdekjen e personit, i lindur në vitin 1988, shtetas turk, e ka konstatuar mjeku kujdestar në Spitalin Rajonal në Prizren.
Ndërsa, personi i lënduar nga rrufeja është i lindur në vitin 1994 edhe ka qenë bashkëkombës i viktimës, i cili fillimisht është dërguar në QKMF në Malishevë dhe pastaj në QKUK në Prishtinë.
Sipas mjekut kujdestar të QKUK-së, gjendja e të lënduarit në fjalë është jashtë rrezikut për jetë.
“Në vendngjarje kanë dalë njësitet relevante të policisë si dhe është njoftuar Prokurori i Shtetit, sipas të cilit është iniciuar hetimi i vdekjes” thuhet në konfirmimin e Policisë së Kosovës.
Ndërsa, si pasojë e kushteve të liga atmosferike edhe në Prishtinë, gjatë të hënës së gjashtë qershorit, një person ka mbetur i vdekur si pasojë e goditjes nga lisi, ndërsa viktima tjetër e lënduar është jashtë rrezikut për jetën.
Një person humb jetën në Prishtinë si pasojë e rrëzimit të një lisi