Sekretari i Përgjithshëm i NATO-s, Mark Rutte, do të zhvillojë këtë të martë një vizitë në Kosovë, ku pritet të takohet me presidenten Vjosa Osmani dhe kryeministrin Albin Kurti.
Sipas njoftimit, sekretari i NATO-s do të ketë konferencë për media me Osmanin, rreth orës 15:00.
Rutte shoqërohet nga një delegacion i lartë i NATO-s, përfshirë ambasadorët e vendeve anëtare.
Kjo vizitë vjen pak javë pas përfundimit të zgjedhjeve në Kosovë dhe në kohën kur po përmendet mundësia e largimit të ushtrisë amerikane nga Evropa.
Për shkak të vizitës, Policia e Kosovës ka marrë masa të shtuara sigurie.
Gjatë ditës do të ketë ndërprerje të përkohshme të qarkullimit në disa segmente rrugore, si dhe riorientim të trafikut në rrugë alternative.
Policia ka kërkuar mirëkuptimin e qytetarëve gjatë lëvizjes së eskortës dhe zhvillimit të takimeve zyrtare.
Veç liderëve të institucioneve të Kosovës, Rutte, i shoqëruar nga ambasadorët e vendeve anëtare të kësaj aleance, do të takohet edhe me komandantin e KFOR-it, Enrico Barduani, ambasadorin e BE-së, Aivo Orav, shefin e EULEX-it, Giovanni Barbano e shefen e UNMIK-ut, Caroline Ziadeh.