Kancelari gjerman, Olaf Scholz, ka kërkuar nga Kosova dhe Serbia të përmbushin obligimet e tyre duke zbatuar Marrëveshjen Bazike, të arritur vitin e kaluar.
Kjo thirrje u bë pas një takimi të zhvilluar të martën në Freiberg të Gjermanisë me presidentin serb, Aleksandar Vuçiq.
Scholz ka theksuar rëndësinë e marrëdhënieve të mira fqinjësore mes vendeve të Ballkanit Perëndimor, duke i cilësuar ato si thelbësore për rrugën drejt integrimit në Bashkimin Evropian.
“Natyrisht, është e rëndësishme që njerëzit në rajon të mbajnë marrëdhënie të mira fqinjësore. Kjo vlen kryesisht për marrëdhëniet ndërmjet Serbisë dhe Kosovës”, ka thënë Scholz.
Scholz ka thënë se marrëdhëniet mes Kosovës dhe Serbisë janë një çështje kyçe për stabilitetin e rajonit dhe përpjekjet për integrim në BE.
Ai ka shtuar se Gjermania është e gatshme të ofrojë mbështetje për të dyja palët në përmbushjen e marrëveshjeve të arritura.
“Ne po punojmë për të ofruar mbështetje për të dyja palët. Ka një marrëveshje që është rënë dakord dhe që duhet të zbatohet”, ka theksuar Scholz.