200 britanik do të shtohen me prezencë në veri të Republikës së Kosovës.
Krejt kjo pasi që Mbretëria e Bashkuar është e shqetësuar me situatën e sigurisë në Kosovë, veqmas pas sulmit terrorist të 24 shtatorit.
Se do të shtohet numri i ushtarëve britanik në kuadër të KFOR-it e ka konfirmuar gjatë ditës Sekretari shtetëror i Mbrojtjes, Hon Grant Shapps.
“Ka qenë një kërkesë nga Komandanti Suprem i NATO-s për Evropë. Kështu që unë kam autorizuar dislokimin e plotë të forcës rezervë strategjike të Mbretërisë së Bashkuar në misionin paqeruajtës të NATO-s në Kosovë. Në ditët e ardhshme, qindra ushtarë nga Batalioni i Parë i Regjimentit Mbretëror të Princeshës së Uellsit do t’u bashkohen 400 ushtarakëve e ushtarakeve që tanimë janë në Kosovë. Dhe si më e mirë së mirës, unë e di se ushtarët tanë do ta bëjnë Mbretërinë e Bashkuar krenare”, ka thënë Hon Gant Shapps – Sekretar shtetëror i Mbrojtjes në MB.
After an urgent request from NATO, I’ve authorised the activation of a battalion of British soldiers to keep the peace in Kosovo
In the coming days, hundreds of service men & women will deploy to ensure the safety & freedom of all in Kosovo and I know they will do the UK proud pic.twitter.com/ybsEgX0FbR
— Rt Hon Grant Shapps MP (@grantshapps) October 1, 2023
E një vendim i tillë është mirëpritur nga një ish-ushtarak.
Hysen Gecaj që ka qenë në gradën e kolonelit në FSK, thotë se ky veprim do të shtoj sigurinë në veri.
“Ky numër i ushtarëve britanik sigurisht se është paraparë që të jetë edhe si numër forcë, por po ashtu edhe ekspertizë për trupat e NATO-s që tani gjenden këtu në Kosovë”, ka deklaruar ish-ushtaraku Hysen Gecaj.
Tutje Gecaj thekson se megjithatë, kufiri i Kosovës me Serbinë, përsëri nuk do të mund të kontrollohet në mënyrë rigoroze.
“Shtimi i numrave në Kosovë të pjesëtarëve të KFOR-it nënkupton edhe rritjen e vigjilencës edhe në brezin kufitar me Serbinë. Mirëpo, kjo nuk nënkupton që ai numër tash duhet ta mbyllë kufirin hermetikisht dhe të siguroj territorin e Kosovës nga hyrjet ilegale dhe kontrabandimi, qoftë i armatimit qoftë i kontrabandimeve të tjera”, është shprehur Gecaj.
E ish-atasheu ushtarak i Kosovës në Shtetet e Bashkuara të Amerikës, Xhavit Gashi, thekson se ky nuk pritet të jetë vendimi i vetëm i NATO-s.
“Rreziku i menjëhershëm ka kaluar, falë gjithë atyre faktorëve që përmendëm. Mirëpo, nuk është largim i përhershëm kërcënimi. Është shumë mirë që po shihet se Serbia është detyruar të dëgjoj zërat nga Shtetet e Bashkuara të Amerikës, por tani besoj që do të ketë edhe një reagim të ri nga NATO-ja”, ka thënë Xhavit Gashi.
Numri i ushtarëve të NATO-s në Kosovë ka lëvizur ndër vite, varësisht nga situata e sigurisë.