Të martën, panairi më i madh i librit në botë ka hapur dyert në Frankfurt të Gjermanisë, me mesazhin “Fjalët bashkojnë botën”.
Pjesë e këtij panairi do të jetë edhe shtëpia botuese nga Kosova, “Dukagjini”.
Kjo shtëpi botuese ka përgatitur botimet e saj të reja duke u munduar të përfshijë lloje të ndryshme të librave për lexuesit.
Kështu, kolana “Anima” tashmë numëron tetë botime, përkthime nga origjinale të veprave të mirëfillta letrare nga klasikë botërorë:
- Sonata e Krojcerit, Lev Tolstoi (Përktheu: Agron Tufa)
- Ledi Makbeth nga guberna e Mcenskut, Nikolai Leskov (Përktheu: Agron Tufa)
- Zhdukja e mistershme e markezes së re De Loria, Jose Donoso (Përktheu: Bajram Karabolli)
- Mjegull, Miguel de Unamuno (Përktheu: Orjela Stafasani) si dhe botimet e fundit për panair:
- Shtrëngimi i vidhës, Henry James (Përktheu: Bashkim Shehu)
- Shënimet e një të vdekuri, Mihaill Bullgakov (Përktheu: Agron Tufa)
- Maitreji, Mircea Eliade (Përktheu: Maniela Sota)
- Varfanjaku i Zotit, Niko Kazanxaqis (Përktheu: Romeo Çollaku).
Po ashtu, në këtë panair do të ofrohen edhe botime të autorëve shqiptarë.
“Libërth dashurie” dhe “Balada e buburrecit” nga Shpëtim Selmani si dhe dy libra studimorë nga fusha e kinematografisë: “Epistema e Dhomës së Zezë” dhe “Ontologjia e Artit të Shtatë” të autorit Glauk Konjufca.
Po ashtu, nga fusha e psikologjisë, shtëpia botuese “Dukagjini” sjell botime të reja përmes imprintit “Lekë”: “Mindsight” dhe “Pse s’ma ka thënë njëri më parë”.
Po ashtu, përveç lektyrave të klasës I dhe II (nga pesë gjithsej), do të zbulohen edhe disa tituj të rinj për klasën III në Panair.
Si pjesëmarrëse Kosova prezantohet nga Shoqata e Botuesve të Kosovës, me ndihmën e Ministrisë së Kulturës, Rinisë dhe Sportit.
Janë mbi 7 mijë e 500 ekspozues me mbi 285 mijë profesionistë të fushës nga e gjithë bota që marrin pjesë në panair.
Kosova është e pranishme në sallën 4.0 stenda C99, sallë e botuesve dhe shteteve ndërkombëtare si: Ukraina, shtetet skandinave, bota arabe, shtetet baltike, Belgjika, shtetet e Evropës Qendrore dhe Holanda.
Pjesëmarrës në këtë panair me botimet më të reja janë edhe botuesit kryesorë të Kosovës, si: “Dukagjini”, Buzuku”, “Koha”, “Faik Konica”, “Pema”, “Artini”, si dhe të tjerë “Albas”, “Meshari”, “Magjia e Librit” dhe “Noa”.
Gjithashtu edhe institucionet si, Akademia e Shkencave dhe e Arteve e Kosovës, Instituti Albanologjik, Instituti i Historisë dhe Universiteti i Prishtinës.
Ndërkaq e ftuar nderi është Spanja.
Panairi i Librit këtë vit fokusohet në temën e përkthimit në shumë drejtime: në gjuhë të tjera, format e tjera të mediumeve dhe konteksteve dhe nevojës për mirëkuptim dhe komunikim ndërkulturor.
Nën moton “Creatividad Desbordante”, e ftuar e nderit e këtij viti, Spanja, do të prezantojë zhvillimet dhe prirjet në jetën e saj letrare dhe kulturore dhe, veçanërisht, industrinë e saj aktuale letrare dhe krijuese.
Muaji tetor shquhet si muaji më i rëndësishëm për ngjarjet kulturore të fushës së librit me dy kryengjarjet: Çmimi Nobel dhe Panairi i Librit në Frankfurt.
Në fundjavë, panairi hapet edhe për qytetarët dhe vizitorët, me ç’rast mbahen promovime me autorë dhe orë letrare në stendën e Kosovës, që është edhe pikëtakim i qindra kosovarëve që jetojnë në Gjermani.
Një rast i jashtëzakonshëm ky për të gjithë diasporën që të njoftohet me prurjet nga letërsia dhe kultura shqiptare, duke mbajtur gjallë lidhjen e trashëgiminë kulturore.