Stuhia posttropikale Fiona ka goditur Kanadanë lindore, me erëra të forta uragani, shira të rrëmbyeshëm dhe dallgë të mëdha, të cilat kanë shkatërruar disa shtëpi dhe lanë qindra mijëra të tjera pa energji elektrike.
Trupat kanadeze janë mobilizuar për të ndihmuar, në përpjekje të rimëkëmbjes pasi kryeministri Justin Trudeau është zotuar të ofrojë ndihmë për të prekurit.
“Unë e di se kjo është një kohë jashtëzakonisht e vështirë për shumë njerëz që kanë parë shtëpinë e tyre, pronën e tyre të shkatërruar. Por e di gjithashtu që këta njerëz e dinë se nuk janë vetëm dhe se ne do të jemi këtu për ta”, ka thënë Trudeau.
Ndërsa, kryebashkiaku i Halifax-it, Mike Savage, ka thënë se çatia e një ndërtese apartamentesh është shembur në qytetin më të madh të Nova Scotia, dhe zyrtarët kishin zhvendosur 100 njerëz në një qendër evakuimi. Përveç dëmeve materiale askush nuk është lënduar rëndë, raporton euronews.
Peter Gregg, drejtor i Nova Scotia Power, ka thënë se erërat kanë shkaktuar dëme të mëdha, dhe moti i keq i ka penguar ekipet e riparimit të dilnin në fillim.
Ai ka shtuar se rreth 380 mijë klientë kishin mbetur pa energji të shtunën pasdite të 24 shtatorit, ndërsa stuhia Fiona e dobësuar ishte largua mbi Gjirin e Shën Lorencit.
Ndërkaq, Qendra Kanadeze e Uraganeve ka shkruar në Twitter, duke thënë se stuhia Fiona kishte presionin më të ulët të regjistruar ndonjëherë për një stuhi që binte në tokë në Kanada, dhe se parashikuesit kishin paralajmëruar se mund të jetë një nga stuhitë më të fuqishme që ka goditur vendin.