Spitalet në Gaza njoftuan se sulmet izraelite kanë vrarë të paktën 12 palestinezë të shtunën, një nga bilancet më të larta që nga marrëveshja e tetorit e cila synon ndaljen e luftimeve.
Sulmet goditën lokacione në veri dhe në jug të Gazës, përfshirë një ndërtesë banimi në Qytetin e Gazës dhe një tendë në Khan Younis, thanë zyrtarë të spitaleve që pranuan trupat e viktimave. Mes të vrarëve janë dy gra dhe gjashtë fëmijë nga dy familje të ndryshme, shkruan AP, transmeton Dukagjini.
Këto sulme ndodhën një ditë para se të planifikohet hapja e një pike kufitare në qytetin më jugor të Gazës, duke kujtuar se numri i viktimave vazhdon të rritet edhe pse një marrëveshje armëpushimi po avancon gradualisht.
Të gjitha pikat kufitare të territorit janë mbyllur që nga fillimi i luftës dhe palestinezët e shohin pikën kufitare të Rafahut me Egjiptin si një litar shpëtimi për dhjetëra mijëra persona që kanë nevojë për trajtim jashtë territorit, ku shumica e infrastrukturës shëndetësore është shkatërruar.
Spitali Shifa njoftoi se sulmi në Qytetin e Gazës vrau një nënë, tre fëmijët e saj dhe një të afërm të tyre, ndërsa Spitali Nasser tha se një sulm në një kamp me tenda shkaktoi shpërthim zjarri, duke vrarë shtatë persona, përfshirë një baba, tre fëmijët e tij dhe tre nipër.
Ministria e Shëndetësisë në Gaza ka regjistruar më shumë se 500 palestinezë të vrarë nga zjarri izraelit që nga fillimi i armëpushimit më 10 tetor. Ministria, që është pjesë e qeverisë së udhëhequr nga Hamasi, mban evidenca të detajuara të viktimave, të cilat konsiderohen përgjithësisht të besueshme nga agjencitë e OKB-së dhe ekspertë të pavarur.
Ushtria izraelite nuk ka reaguar menjëherë ndaj pyetjeve lidhur me këto sulme.