Arabia Saudite ka dënuar atë që e ka cilësuar si sulm iranian ndaj një supertankeri në pronësi saudite, ku humbën jetën dy marinarë filipinas.
Kompania shtetërore saudite e transportit detar, Bahri, konfirmoi të mërkurën se anija Sidr ishte përfshirë në një “incident sigurie” gjatë kalimit në Ngushticën e Hormuzit.
Sipas kompanive të sigurisë detare, Sidr u godit nga predha në veri të gadishullit Musandam të Omanit. Në të njëjtën kohë, një tjetër supertanker, Senegal Prosperity, në pronësi të një kompanie nga Koreja e Jugut, raportohet se u godit në lindje të Musandamit.
Irani nuk ka reaguar ndaj akuzave të Arabisë Saudite. Megjithatë, Garda Revolucionare Islamike e Iranit tha më herët se dy cisterna nafte kishin marrë flakë pasi kishin goditur mina gjatë përdorimit të një rruge të paautorizuar në Ngushticën e Hormuzit.
Bahri tha se incidenti me anijen Sidr ndodhi rreth orës 23:40 sipas kohës lokale të hënën.
“Me trishtim të thellë, Bahri konfirmon humbjen e dy marinarëve të saj filipinas si pasojë e incidentit”, thuhet në deklaratën e kompanisë, e cila shprehu ngushëllime për familjet dhe të afërmit e viktimave.
Ministria e Jashtme e Arabisë Saudite më pas dënoi atë që e quajti “shënjestrim nga Irani të cisternës saudite Sidr” gjatë kalimit në Ngushticën e Hormuzit.
Rijadi dënoi gjithashtu sulmet e fundit iraniane ndaj Jordanisë, Bahreinit dhe Kuvajtit, duke bërë thirrje për ndalimin e përshkallëzimit, respektimin e sigurisë së lundrimit ndërkombëtar dhe mbrojtjen e furnizimit global me energji.
Sipas kompanive të sigurisë dhe inteligjencës detare Marisks dhe Kpler, të dyja anijet transportonin nga rreth dy milionë fuçi naftë bruto saudite dhe u goditën nga predha të panjohura brenda pak minutash nga njëra-tjetra, teksa po largoheshin nga Ngushtica e Hormuzit të hënën në mbrëmje.
Ndërkohë, tensionet në rajon janë përshkallëzuar pas sulmeve ajrore amerikane ndaj Iranit dhe sulmeve iraniane me raketa e dronë ndaj bazave amerikane në shtetet arabe fqinje.